عَرْش کی عَقْل دَنگ ہے

arsh ki aqal dang he

عرش کی عَقْل دَنگ ہے چَرْخ [1] میں آسمان ہے
جانِ مُراد اب کدھر ہائے تِرا مکان ہے

بزمِ ثنائے زُلْف میں میری عروسِ فِکْر کو
ساری بَہارِ ہَشْت خُلد2 چھوٹا سا عِطْر دان ہے

عرش پہ جا کے مُرغِ3 عقل تھک کے گِرا غش آ گیا
اور ابھی منزلوں پَرے پہلا ہی آستان ہے

عرش پہ تازہ چھیڑ چھاڑ فرش میں طُرفہ4 دُھوم دَھام
کان جِدھر لگائیے تیری ہی داستان ہے

اِک ترے رُخ کی روشنی چین ہے دو جہان کی
اِنس5 کا اُنس6 اُسی سے ہے جان کی وہ ہی جان ہے

وہ جو نہ تھے تو کچھ نہ تھا وہ جو نہ ہوں تو کچھ نہ ہو
جان ہیں وہ جہان کی جان ہے تو جہان ہے

گود میں عالَم شباب حالِ شباب کچھ نہ پوچھ!
گُلْبُنِ باغِ نُور کی اور ہی کچھ اُٹھان ہے
------------------------------------------------------
([1])...چکر، گردش۔ (2)...ہشت خُلد: آٹھوں جنتیں۔ (3)...پرندہ۔ (4)...عجیب، انوکھی۔ (5)...انسان۔ (6)...محبت، الفت، رغبت۔
------------------------------------------------------

تجھ سا سِیاہ کار کون اُن سا شفیع ہے کہاں
پھر وہ تجھی کو بھول جائیں دِل! یہ تِرا گمان ہے

پیشِ نظر وہ نو بہار سجدے کو دِل ہے بے قرار
روکیے سر کو روکیے ہاں یہی امتحان ہے

شانِ خُدا نہ ساتھ دے اُن کے خِرام [1] کا وہ باز
سِدْرَہ سے تا زَمیں جسے نرم سی اِک اُڑان ہے

بارِ جلال اُٹھا لیا گرچِہ کلیجا شق ہُوا
یوں تو یہ ماہِ سبزہ رنگ نظروں میں دَھان پَان2 ہے

خوف نہ رکھ رضاؔ ذرا تُو تَو ہے عَبْدِ مصطفےٰ
تیرے لئے امان ہے تیرے لئے امان ہے
------------------------------------------------------
([1])...ناز وادا کی رفتار۔ (2)...نازک۔

از: اعلیٰ حضرت، امامِ اہلسنت مولانا شاہ امام احمد رضا خان عَلَیْہِ رَحْمَۃ ُالرَّحْمٰن